Ақш Исроил туфайли БМТга қарши чиқди

1-июл куни АҚШ ҳукумати Бирлашган Миллатлар Ташкилотининг Фаластин бўйича махсус маърузачиcи Франсеска Албанезе томонидан тайёрланган ҳисоботга кескин эътироз билдирди. Ушбу ҳисоботда бир қатор йирик халқаро компаниялар – жумладан, Google, Amazon, Microsoft ва Palantir – Исроилнинг Фаластиндаги ҳаракатларини молиявий ва технологик жиҳатдан қўллаб-қувватлаётгани учун танқид қилинди.

Албанезе ўз ҳисоботида Исроил томонидан олиб борилаётган ҳарбий ҳаракатларни “босқин”, “геноцид” ва “апартейд” деб атап, бу ҳаракатлар орқали Исроил иқтисодий фойда олаётганини таъкидлади. Унга кўра, 2023-йил октябридан буён Ғазо секторидаги урушда 56 мингдан ортиқ фаластинлик ҳалок бўлган, Исроил фонд бозори эса бу даврда 179 фоизга ўсган.

Шунингдек, ҳисоботда кўплаб қурол ишлаб чиқарувчи компаниялар, масалан Elbit Systems ва Lockheed Martin, Исроилнинг ҳарбий фаолиятида фаол иштирок этаётган технологик компаниялар билан бир қаторда тилга олинган. Албанезе бу компанияларнинг фаолиятини “геноцид иқтисодиёти”нинг бир қисми деб атади.

АҚШ расмийлари ушбу ҳисоботни “ҳақоратли” ва “асоссиз” деб атаб, БМТ Бош котиби Антониу Гутерришдан Франсеска Албанезени лавозимидан четлатишини талаб қилди. Вашингтон, агар бу талаб бажарилмаса, БМТга нисбатан “жиддий чоралар” кўрилишини маълум қилди.

Албанезе ўз навбатида Исроилга қурол эмбаргоси қўйишни, компанияларга эса ҳарбий жиноятларда ҳамкорлик қилганлик айби билан тергов очишни таклиф қилди.

Ушбу можаро Халқаро жиноий суд томонидан Исроил бош вазири Биньямин Нетаняху ва собиқ мудофаа вазири Йоав Галантга қарши ҳибсга олиш ордери берилган, ҳамда БМТ судида Исроилга нисбатан геноцид иши кўриб чиқилаётган бир вақтда юз бермоқда.